Ky vendim i Këshillit të Ministrave parashikon krijimin e Qendrës së Inovacionit të Sigurisë dhe Mbrojtjes si një person juridik publik buxhetor, në varësi të Ministrisë së Mbrojtjes. Qëllimi kryesor i kësaj Qendre është nxitja e inovacionit dhe e të gjitha proceseve të lidhura me të në fushën e sigurisë dhe mbrojtjes.
Përgjegjësitë kryesore të Qendrës përfshijnë zhvillimin e projekteve inovative në fushën e Sigurisë dhe Mbrojtjes, testimin dhe eksperimentimin e teknologjive të reja, mbështetjen e kërkimit dhe zhvillimit të ideve të reja të sipërmarrjes, nxitjen e projekteve inovative të paraqitura nga institucione të ndryshme, dhënien e kontributit në rritjen e sigurisë kibernetike, përmirësimin e sistemeve të komunikimit e monitorimit etj.
